Да 40-й гадавіны аварыі на Чарнобыльскай АЭС у Музеi пажарнай і аварыйна-выратавальнай справы адкрыецца мемарыяльная фотавыстава «Эха Чарнобыля: праз 40 гадоў». Музей выступае арганізатарам праекта і звяртаецца да фатографаў, відавочцаў падзей і ўсіх неабыякавых з просьбай далучыцца да фарміравання экспазіцыі.

26 красавіка 2026 года спаўняецца 40 гадоў з дня найбуйнейшай тэхнагеннай катастрофы ХХ стагоддзя. Выстава будзе прысвечана памяці ахвяр, подзвігу ліквідатараў і лёсам людзей, чые жыцці падзяліліся на «да» і «пасля». Асаблівую ўвагу плануецца надаць архіўным аўтарскім фотаздымкам перыяду ліквідацыі наступстваў аварыі, партрэтам удзельнікаў тых падзей, кадрам з пацярпелых рэгіёнаў, а таксама сучасным фотаздымкам, якія асэнсоўваюць тэму памяці і адказнасці.

Арганізатары просяць аўтараў прадаставіць уласныя фотаматэрыялы ў высокай якасці ў фармаце JPG з рэкамендаваным дазволам для друку фармату А4 і гарызантальнай арыентацыяй. Кожная работа павінна мець назву, а таксама суправаджацца звесткамі пра аўтара з указаннем прозвішча, імя, даты нараджэння, месца працы або вучобы і кантактнага тэлефона. Па жаданні можна дадаць кароткі каментарый.

Фотаздымкі прымаюцца па электроннай пошце propaganda@ucp.by
да 20 сакавіка 2026 года ўключна. Экспазіцыя будзе працаваць з 1 красавіка па 1 мая 2026 года ў залах музея.

Удзел у фотавыставе з’яўляецца бязвыплатным. Арганізатары пакідаюць за сабой права адбору работ. Дасылаючы матэрыялы, аўтар пацвярджае сваё аўтарства і згоду на бясплатнае публічнае экспанаванне ў межах праекта.