Курсанты Універсітэта грамадзянскай абароны МНС прынялі ўдзел у мерапрыемстве да Дня роднай мовы «Ода беларускай жанчыне», якое прайшло ў Нацыянальным акадэмічным драматычным тэатры імя Янкі Купалы. Будучыя ратавальнікі наведалі культурную падзею на чале з лідарам маладзёжнага крыла Беларускага саюза жанчын МНС Анастасіяй Сокалавай.

Свята аб’яднала прадстаўніц розных рэгіёнаў краіны, дзеячаў культуры, сем’і, моладзь. Са сцэны гучалі вершы беларускіх паэтаў і аўтарскія творы, прысвечаныя жанчыне — маці, жонцы, захавальніцы традыцый і духоўных каштоўнасцей. Сёлета мерапрыемства набыло асаблівае гучанне ў кантэксце Года беларускай жанчыны.

Курсанты ўніверсітэта сталі ўдзельнікамі імпрэзы разам з гасцямі з розных куткоў Беларусі. У зале панавала атмасфера павагі да роднай мовы і нацыянальнай культуры. Асобная ўвага была нададзена ролі жанчыны ў захаванні духоўнай спадчыны і сямейных традыцый.

Анастасія Сокалава адзначыла, што ўдзел у такіх мерапрыемствах спрыяе фарміраванню грамадзянскай пазіцыі моладзі і ўмацаванню павагі да роднай мовы. Яна падкрэсліла, што беларуская мова з’яўляецца часткай нацыянальнай самасвядомасці, а паэтычнае слова дапамагае глыбей адчуць сувязь пакаленняў. Паводле яе слоў, для курсантаў важна быць далучанымі да культурнага жыцця краіны і падтрымліваць ініцыятывы, якія накіраваны на захаванне гістарычнай памяці і духоўных каштоўнасцей.

У межах мерапрыемства ў тэатры была арганізавана фотавыстава «Імгненні жыцця», якая прадставіла вобразы беларускіх жанчын у паўсядзённасці. Экспазіцыя падкрэсліла прыгажосць звычайных момантаў і значнасць кожнага пражытага дня.